ढाकेफळ शिवारात भीषण अपघात; शिंदेसेनेच्या तालुका उपप्रमुखांचा दुर्दैवी अंत

 रेणुकादेवी यात्रेहून परतताना राष्ट्रीय महामार्गावर कारने दुचाकीला दिली धडक; उपचारापूर्वीच मृत्यू

केज (प्रतिनिधी):

अहमदनगर–अहिल्यानगर राष्ट्रीय महामार्गावर ढाकेफळ शिवारातील कारभारी हॉटेलसमोर झालेल्या भीषण कार-दुचाकी अपघातात शिंदेसेनेचे केज तालुक्याचे उपप्रमुख चंद्रकांत शहाजी इंगळे (वय ५०, रा. सादोळा) यांचा जागीच मृत्यू झाला. ही दुर्घटना रविवारी सायंकाळी सुमारे ६ वाजण्याच्या सुमारास घडली.

चंद्रकांत इंगळे हे केज तालुक्यातील पिसेगाव येथे भरवण्यात आलेल्या दोन दिवसांच्या रेणुकादेवी यात्रेच्या पहिल्या दिवशी दर्शनासाठी गेले होते. दर्शन आटोपून ते दुचाकी क्रमांक एमएच ४४ / एसी ६९३१ वरून सादोळा येथे परतत असताना अंबाजोगाईहून अहिल्यानगरकडे जाणाऱ्या कार क्रमांक एमएच १६ / डीसी ८८४७ ने ढाकेफळ शिवारात कारभारी हॉटेलसमोर त्यांच्या दुचाकीला जोरदार धडक दिली.

या अपघातात ते गंभीर जखमी झाले असून अपघातानंतर त्यांना केज येथील उपजिल्हा रुग्णालयात दाखल करण्यात आले. मात्र, वैद्यकीय अधिकारी डॉ. निवृत्ती मुंडे यांनी तपासणीनंतर त्यांना मृत घोषित केले. त्यांच्या पश्चात पत्नी, दोन मुले, भावजई व दोन पुतणे असा परिवार आहे.

दहा वर्षांपूर्वी दुचाकी अपघातात त्यांचे बंधू शिवशंकर शहाजी इंगळे यांचा मृत्यू झाला होता. पुन्हा त्याच प्रकारच्या अपघातात चंद्रकांत इंगळे यांचा मृत्यू झाल्याने सादोळा व केज परिसरात हळहळ व्यक्त होत आहे.