माजलगाव: शहरातील मुख्य रस्त्यावर चव्हाण हॉस्पिटलसमोर रविवारी रात्री एक धक्कादायक घटना घडली. मोपेडला कट मारल्याचा जाब विचारल्यामुळे पाच जणांच्या टोळक्याने शुभम रूपचंद कांबळे या तरुणाला अमानुषपणे मारहाण केली. या प्रकरणी माजलगाव शहर पोलिसांनी पाचही संशयितांना जातीय शिवीगाळ आणि खुनाचा प्रयत्न केल्याच्या आरोपाखाली ताब्यात घेतले आहे.
नेमकी घटना काय?
मिळालेल्या माहितीनुसार, शुभम कांबळे हा मुख्य रस्त्यावरून आपल्या दुचाकीवरून जात असताना, रवी कुऱ्हाडे याने त्याच्या गाडीला कट मारला. शुभमने 'गाडीला कट का मारला?' असा जाब विचारला असता, रवीने त्याला जातीयवाचक शिवीगाळ करत मागून धडक दिली. त्यानंतर रवी कुऱ्हाडे आणि लक्ष्मण शिंदे यांनी इतर काही साथीदारांना बोलावून शुभमवर हल्ला चढवला.
पालकांनाही जीवे मारण्याची धमकी
जीव वाचवण्यासाठी शुभम पळत असताना विशाल, विलास आणि राहुल चव्हाण यांनी त्याला पकडले. यावेळी रवी कुऱ्हाडे याने शुभमचा गळा दाबून त्याला जीवे मारण्याचा प्रयत्न केला, तर लक्ष्मण शिंदे याने त्याच्या छातीवर आणि गुप्तांगावर लाथा मारल्या. मुलाला वाचवण्यासाठी धावून आलेले वडील रूपचंद कांबळे यांनाही आरोपींनी जातीय शिवीगाळ करत जीवे मारण्याची धमकी दिली.
पोलिसांची तात्काळ कारवाई
शुभम आणि त्याचे वडील रूपचंद कांबळे यांच्या तक्रारीवरून पोलिसांनी रवी कुऱ्हाडे, विशाल चव्हाण, विलास चव्हाण, राहुल चव्हाण आणि लक्ष्मण शिंदे (सर्व रा. वडरवाडा) यांच्या विरोधात अॅट्रॉसिटी कायद्यासह विविध कलमान्वये गुन्हा दाखल केला आहे. उपविभागीय पोलीस अधिकारी अनिल कटके आणि सहाय्यक पोलीस निरीक्षक प्रल्हाद मुंडे या प्रकरणाचा अधिक तपास करत आहेत.
No comments:
Post a Comment