बीड पोलीस भरतीदरम्यान दुर्दैवी घटना; धावण्याच्या चाचणीत तरुणाचा मृत्यू!

 मृत तरुण परळी तालुक्यातील असल्याची माहिती

बीड (प्रतिनिधी) — बीड येथे सुरू असलेल्या पोलीस भरती प्रक्रियेदरम्यान आज मैदानी चाचणीवेळी एक दुर्दैवी घटना घडली. धावण्याच्या फेरीत सहभागी झालेला एक उमेदवार अचानक चक्कर येऊन मैदानावर कोसळला. उपस्थित अधिकाऱ्यांनी तात्काळ त्याला उपचारासाठी शासकीय रुग्णालयात हलविले.

मात्र, रुग्णालयात वैद्यकीय तपासणीनंतर संबंधित उमेदवाराचा मृत्यू झाल्याचे डॉक्टरांनी घोषित केले. घटनेमुळे भरती केंद्रावर काही काळ तणावपूर्ण वातावरण निर्माण झाले.

मृत उमेदवार दीपक भास्कर वावळ (रा. परळी तालुका) असल्याची माहिती सूत्रांकडून देण्यात आली. घटनेनंतर पोलीस प्रशासनाकडून आवश्यक कायदेशीर प्रक्रिया सुरू करण्यात आली आहे .