रात्रीच्या वेळी महामार्गावर प्रवास करणे किती धोकादायक ठरू शकते, याचा प्रत्यय अंबाजोगाई येथील एका व्यापाऱ्याला आला आहे. लघुशंकेसाठी कार थांबवताच दबा धरून बसलेल्या चार अज्ञात चोरट्यांनी चाकूचा धाक दाखवत तब्बल ४ लाख १० हजार रुपयांचा ऐवज लंपास केल्याची धक्कादायक घटना अंकुर फाट्याजवळ घडली. या घटनेमुळे परिसरात भीतीचे वातावरण पसरले आहे.
अंबाजोगाई येथील व्यापारी श्रीराम सतीश ढगे (वय ३२) हे गुरुवारी रात्री आपल्या कारने लोखंडी सावरगाव मार्गे धानोरा खुर्दकडे जात होते. रात्री सुमारे ११ वाजण्याच्या सुमारास अंकुर फाट्याजवळ त्यांनी लघुशंकेसाठी कार थांबवली. कारमधून उतरताच २५ ते ३० वयोगटातील चार अज्ञात चोरट्यांनी त्यांना वेढले.
चोरट्यांनी चाकूचा धाक दाखवत त्यांच्या गळ्यातील १७ ग्रॅमचे सोन्याचे लॉकेट, बोटातील २० ग्रॅम वजनाच्या तीन सोन्याच्या अंगठ्या, लॅपटॉप आणि १५ हजार रुपयांची रोकड असा मौल्यवान ऐवज जबरदस्तीने काढून घेतला व घटनास्थळावरून पसार झाले.
घटनेची माहिती मिळताच युसूफवडगाव पोलिसांनी तातडीने तपासाची चक्रे फिरवली. सहाय्यक पोलीस निरीक्षक मच्छिंद्र शेंडगे यांच्या मार्गदर्शनाखाली श्वान पथक, ठसेतज्ज्ञ आणि फॉरेन्सिक टीमने घटनास्थळी धाव घेऊन पुरावे गोळा केले आहेत. या प्रकरणाचा तपास स्थानिक गुन्हे अन्वेषण विभाग करत असून, लवकरच आरोपींच्या मुसक्या आवळल्या जातील, असा विश्वास पोलिसांनी व्यक्त केला आहे.
No comments:
Post a Comment