राजपाल यादवच्या मदतीसाठी पुढे सरसावले सोनू सूद आणि तेज प्रताप यादव

 चेक बाऊन्स प्रकरणात तिहार तुरुंगात आत्मसमर्पण; आर्थिक अडचणींवर मदतीचा हात

बॉलिवूड अभिनेता राजपाल यादव यांनी चेक बाऊन्स प्रकरणात गेल्या आठवड्यात गुरुवारी दिल्लीतील तिहार तुरुंगात आत्मसमर्पण केले. त्यांच्या आर्थिक अडचणींबाबत माध्यमांमध्ये आलेल्या वृत्तांनंतर सोशल मीडियावर मोठ्या प्रमाणात चर्चा सुरू झाली असून अनेकांनी त्यांना मदतीचा हात पुढे केला आहे.

मंगळवारी बॉलिवूड अभिनेता सोनू सूद यांनी त्यांच्या आगामी चित्रपट प्रकल्पासाठी राजपाल यादव यांना साइनिंग अमाऊंट देणार असल्याची माहिती दिली. त्याचबरोबर लालू प्रसाद यादव यांचे पुत्र व जनशक्ती जनता दलचे नेते तेज प्रताप यादव यांनीही राजपाल यादव यांना आर्थिक मदत करण्याची घोषणा केली आहे.

दरम्यान, दिल्ली उच्च न्यायालयाने राजपाल यादव यांना ४ फेब्रुवारीपर्यंत आत्मसमर्पण करण्याची मुदत दिली होती. मात्र, ५ फेब्रुवारी रोजी त्यांनी तिहार तुरुंगात हजेरी लावली. यावेळी न्यायालयाने स्पष्ट शब्दांत सांगितले की, “न्यायालयाच्या आदेशांचे उल्लंघन करणे म्हणजे कायद्याप्रती अनादर दाखवणे होय. केवळ अभिनेता किंवा चित्रपटसृष्टीशी संबंधित असल्याच्या आधारावर कोणतीही विशेष सवलत दिली जाऊ शकत नाही.”

माध्यमांतील वृत्तानुसार, तुरुंगात आत्मसमर्पण करण्यापूर्वी राजपाल यादव भावुक झाल्याचे सांगितले जात आहे. या घटनेनंतर चित्रपटसृष्टीतील अनेक मान्यवरांनी राजपाल यादव यांच्या मदतीसाठी आवाहन केले आहे.