नगरपालिका प्रशासनाच्या वतीने शहरात स्वच्छता मोहीम सुरू; मात्र नाल्यातील कचरा महिनाभरापासून रस्त्यावरच
शहरात नगरपालिका प्रशासनाच्या वतीने स्वच्छता मोहीम हाती घेण्यात आली आहे. पवित्र रमजान महिना सुरू असल्याने शहरात कामाचा व्याप वाढलेला असताना स्वच्छतेच्या कामाला गती देण्यात येत असल्याचा दावा प्रशासनाकडून करण्यात येत आहे.
मात्र प्रत्यक्षात काही भागांमध्ये महिनाभरापूर्वी नाल्यांची साफसफाई करण्यात आली असली तरी त्या नाल्यांमधून बाहेर काढलेला कचरा अद्यापही रस्त्याच्या कडेला उघड्यावरच पडून आहे. त्यामुळे परिसरात दुर्गंधी पसरत असून नागरिकांच्या आरोग्याचा प्रश्न निर्माण झाला आहे.
स्थानिक नागरिकांच्या म्हणण्यानुसार, नाली स्वच्छता केल्यानंतर कचरा तात्काळ उचलून नेणे अपेक्षित असताना तो तसाच पडून असल्याने डासांचे प्रमाण वाढले आहे. विशेषतः रमजान महिन्यात मशिदींकडे जाणाऱ्या नागरिकांना या अस्वच्छतेचा त्रास सहन करावा लागत आहे.
“नाल्या साफ करून कचरा रस्त्यावर टाकणे आणि तो उचलायला महिनाभर लावणे, याचा अर्थ काय?” असा सवाल नागरिक उपस्थित करत आहेत. नगरपालिकेच्या कर्मचाऱ्यांना हा कचरा उचलण्यासाठी नेमका कोणता मुहूर्त पाहिजे, अशी उपरोधिक टीकाही होत आहे.
दरम्यान, संबंधित विभागाने याकडे तात्काळ लक्ष देऊन रस्त्यावर पडलेला कचरा उचलावा व स्वच्छता मोहिमेची प्रभावी अंमलबजावणी करावी, अशी मागणी नागरिकांकडून करण्यात येत आहे.
No comments:
Post a Comment